Čeäppõõzzlaž tuâjj-joukk: Aimo Aikio, Tero Harju, Tuuli Malla da Erja Taskinen

Päi ́ǩǩ → Toppilansaari, Oulu

29.5.–6.6.2026, 11:00-18:00.

Jiõntõõzzin mieʹldd: Lenita Moshnikoff Buljo, Tero Harju, Tauno Porsanger, Gunn-Marie Trasti, Elina Vuoti, Heini Wesslin, Njõlljokk di Njauddâmjokk.

Kollʼješkuätt-tuejjõs lij jiõnnpääʹljesobbvuõtt, mâʹst jieʹlli pirrõõzz jiõn lie še vueʹssen ǩiõččlâsttmõõžžâst. Tuejjõʹsse koʹlle čiččâm šäiggan, kooi ool lie pijjum pieʹss da muõrr. Šäiggnin peäss kuullâd jeäʹrbi mieʹldd, mäʹhtt Heini Wesslin neäskk da åsttad, Tauno Porsanger juŋstââll Čeʹvetjääuʹrest di Gunn-Marie Trasti ceälkk tiivt. Jiõntõõzzin kuulât še Njõlljooǥǥ da Njauddâmjooǥǥ kolggâm nuʹtt ǩeässa ko še tälvva. Šuurmõs vueʹzz jiõntõõzzin leät liânttääm iiʹjji 2022–2023 Čeʹvetjääuʹrest, Njauddmest da Ǩeârkknjaarǥâst. Lââʹssen mieʹldd lie Mari Matvei leeuʹd Lääʹddjânnam ǩeerjlažvuõđ sieʹbr arkiivâst eeʹjjest 1922.

Tuejjõs lij čuäʹjtum vuõss vuâra Taar peäʹl Njauddmest Äʹvv Saaʹmi muʹzeeʹj šeelljast ǩeässa 2023. Teʹl sääʹmǩiõl ǩiõlltuâjj leäi äʹlǧǧmen sääʹmvuuʹdest Taar peäʹlnn, da tuejjõõzz nõmm Kollʼješkuätt viiʹttji še tän tuõjju. Eeʹjj 2025 Taar peäʹl Njauddma leät mââimõõzzâst vuäǯǯam vuäʹpstemkõõlbid sääʹmǩiõllsaž päiʹǩǩnõõmid, mii lij õhtt konkreettlaž čuäjtõs tõʹst, mäʹhtt sääʹmǩiõll kollai da šâdd jäänab kuâsttjeeʹjen. Rämmšep, što vuäǯǯap tuejjõõzz mieʹldd ARToulu-čeäppõsvoudda da što vuäǯǯap puʹhtted jiõnid sääʹmvuuʹdest kuullâmnalla Oulust še.